Рэспубліканскі суботнік пройдзе ў Беларусі 18 красавіка

Рэспубліканскі суботнік пройдзе ў Беларусі 18 красавіка. Адпаведную пастанову падпісаў прэм'ер-міністр Беларусі Аляксандр Турчын, паведамілі БЕЛТА ў прэс-службе ўрада.

Грашовыя сродкі, заробленыя ад правядзення вясенняга суботніка, будуць накіраваны на стварэнне пастаяннай экспазіцыі Нацыянальнага гістарычнага музея Беларусі, які будуецца, і іншыя звязаныя з гэтым работы.

Паводле інфармацыі Нацыянальнага прававога інтэрнэт-партала, суботнік можа быць праведзены на рабочых месцах. Таксама можна ажыццявіць азеляненне, добраўпарадкаванне і прывядзенне ў належны стан аб'ектаў і тэрыторый населеных пунктаў, знакавых аб'ектаў, гісторыка-культурных каштоўнасцей, мемарыяльных комплексаў, мясцін баявой і воінскай славы, пахаванняў воінаў і партызан часоў Вялікай Айчыннай вайны.

Грашовыя сродкі, заробленыя ў дзень правядзення рэспубліканскага суботніка, у тым ліку на рабочых месцах, у аб'ёмах, што вызначаюцца добраахвотна работнікамі, уключаючы работнікаў, дзейнасць якіх не звязана з вытворчасцю прадукцыі (работ), аказаннем платных паслуг, пералічаюцца праз раённыя і гарадскія выканкамы ў аблвыканкамы і Мінскі гарвыканкам ва ўстаноўленым Міністэрствам фінансаў парадку. Некамерцыйныя арганізацыі, якія прымаюць удзел у суботніку па рашэнні іх калектываў, могуць пералічыць адпаведныя сродкі ў добраахвотна вызначаемым памеры ва ўстаноўленым Мінфінам парадку.

Утрыманне наймальнікамі грашовых сродкаў з заработнай платы работнікаў, для якіх 18 красавіка з'яўляецца рабочым днём, ажыццяўляецца з іх пісьмовай згоды ў памерах, якія вызначаюцца добраахвотна самімі калектывамі работнікаў.

Для падрыхтоўкі і правядзення рэспубліканскага суботніка створана часовая рабочая група, якую ўзначальвае намеснік прэм'ер-міністра Наталля Пяткевіч. У яе склад увайшлі кіраўнікі шэрага міністэрстваў, Нацыянальнага статыстычнага камітэта, аблвыканкамаў і Мінскага гарвыканкама.

Міністэрству транспарту і камунікацый, аблвыканкамам і Мінскаму гарвыканкаму даручана забяспечыць 18 красавіка бесперабойную работу пасажырскага транспарту, а Міністэрству інфармацыі - арганізаваць асвятленне ў СМІ ходу падрыхтоўкі і правядзення рэспубліканскага суботніка.

БелТА