Лукашэнка аб уступленні ў ШАС: гэты дзень увойдзе ў гісторыю Беларусі

Дзень уступлення Беларусі ў Шанхайскую арганізацыю супрацоўніцтва ўвойдзе ў гісторыю краіны. Аб гэтым кіраўнік беларускай дзяржавы Аляксандр Лукашэнка заявіў на пасяджэнні Савета кіраўнікоў дзяржаў - членаў ШАС у Астане, перадае карэспандэнт БЕЛТА.

Прэзідэнт выказаў словы ўдзячнасці ў адрас гаспадароў саміту - казахстанскага боку - за выдатную арганізацыю сустрэчы і сардэчны прыём у Астане. "Дзякуючы ў тым ліку і вашаму паспяховаму старшынству гэты дзень увойдзе ў гісторыю Беларусі як дата далучэння нашай краіны да Шанхайскай арганізацыі супрацоўніцтва", - сказаў беларускі лідар.

Аляксандр Лукашэнка назваў паказальным і сімвалічным яшчэ і той факт, што год прыняцця ў ШАС супаў з 80-годдзем вызвалення Беларусі ад нямецка-фашысцкіх захопнікаў. "Гэта цудоўны падарунак беларускаму народу", - заявіў кіраўнік дзяржавы.

Прэзідэнт таксама падзякаваў астатнім калегам - кіраўнікам дзяржаў ШАС - за аднадушную падтрымку гэтага рашэння.

Кіраўнік дзяржавы расказаў аб канкрэтных напрамках, якім Беларусь у якасці паўнапраўнага ўдзельніка плануе ўдзяліць павышаную ўвагу. Ён запэўніў, што краіна гатова працаваць поплеч з новым старшынствам (пасля Казахстана старшынства ў ШАС пяройдзе Кітаю) па рэалізацыі сумесных прыярытэтаў.

Аб міжнароднай бяспецы

"Глыбока перакананы, што ў XXI стагоддзі неабходна выбудоўваць сапраўдную і непадзельную глабальную бяспеку. Пры гэтым ініцыятыву павінны ўзяць на сябе краіны Глабальнай большасці, паколькі эгаістычны Захад на такое аказаўся няздольны. Там сёння няма лідараў, здольных прымаць адказныя рашэнні самастойна", - заявіў Аляксандр Лукашэнка.

Са свайго боку, запэўніў ён, Беларусь пастараецца адаптаваць свае ініцыятывы ў гэтай найбольш актуальнай сёння для партнёраў сферы.

Аб эканоміцы

Кіраўнік дзяржавы канстатаваў, што ўжо цяпер у партнёраў па ШАС ёсць узаемавыгадныя праекты ў энергетыцы, транспарце і лагістыцы, фінансах і прамысловай кааперацыі. "Калі мы выпрацуем на нашай пляцоўцы дакладныя правілы, выйграюць усе, у тым ліку за межамі рэгіёна адказнасці ШАС", - упэўнены беларускі лідар.

Аб харчовай бяспецы

Гаворачы аб харчовай бяспецы, Аляксандр Лукашэнка заўважыў, што выклікі ў гэтай галіне зыходзяць не толькі ад традыцыйных фактараў, такіх як змяненне клімату і прыродныя катаклізмы, але і штучных бар'ераў, у тым ліку незаконных санкцый адносна мінеральных угнаенняў, тэхнікі, сродкаў аховы раслін, маршрутаў паставак. Як вынік, людзі ў краінах, якія сталі на шлях развіцця, у тым ліку бяднейшыя дзяржавы Азіі, Афрыкі і Лацінскай Амерыкі, вымушаны галадаць.

"У нашых сілах разбурыць сцены аднапалярнага свету, накарміць людзей, устараніўшы шмат супярэчнасцей і канфліктаў з-за сацыяльнай няроўнасці, дэфіцыту прадуктаў харчавання і рэсурсаў", - падкрэсліў кіраўнік дзяржавы.

Аб міжнародным пазіцыянаванні

"Мы пастараемся прыкласці ўсе намаганні, каб рос аўтарытэт нашай арганізацыі, пашыралася кола яе саюзнікаў і прыхільнікаў", - запэўніў Аляксандр Лукашэнка.

Ён адзначыў, што многія беларускія ідэі, выказаныя раней, ужо атрымалі міжнародную падтрымку. Гэта датычыцца трансферу тэхналогій, інфармацыйнай бяспекі, транспарту і лагістыкі, прамысловасці, гандлю і інвестыцый.

"Цяпер ужо ў новай якасці мы будзем імкнуцца максімальна ўвязаць нашы прапановы з ініцыятывамі нашай арганізацыі", - сказаў Прэзідэнт.

Аб узаемным узбагачэнні культур

"Беларусь пачынае работу ў Шанхайскай арганізацыі супрацоўніцтва з разуменнем, што ШАС - гэта не толькі бяспека, эканоміка і гандаль. Гэта і ўзаемнае ўзбагачэнне культур, што прывядзе да абавязковага збліжэння нашых народаў", - адзначыў кіраўнік дзяржавы.