Кіраўнікі МЗС Беларусі і Кітая правялі перагаворы ў Пекіне

У Пекіне 8 ліпеня адбыліся перагаворы міністра замежных спраў Рэспублікі Беларусь Максіма Рыжанкова з міністрам замежных спраў Кітайскай Народнай Рэспублікі Ван І. Аб гэтым БЕЛТА паведамілі ў прэс-службе МЗС Беларусі.

Кіраўнікі знешнепалітычных ведамстваў у давернай атмасферы грунтоўна разгледзелі ўвесь спектр пытанняў двухбаковага супрацоўніцтва, узаемадзеяння на міжнароднай арэне, глабальнай і рэгіянальнай бяспекі, узгаднілі графік перспектыўных міждзяржаўных кантактаў на вышэйшым і высокім узроўнях.

Міністры канстатавалі, што высокі тэмп беларуска-кітайскім адносінам задаюць кіраўнікі дзвюх дзяржаў. У сувязі з гэтым прыярытэтная ўвага ўдзелена дэталізацыі канкрэтных праектаў і дамоўленасцей, дасягнутых Аляксандрам Лукашэнкам і Сі Цзіньпінам у Астане ў рамках саміту ШАС. У іх ліку выкарыстанне гранта кітайскага боку для будаўніцтва новага сацыяльнага аб'екта ў Беларусі.

Бакі пацвердзілі ўзаемную падтрымку справядлівага шматпалярнага светаўладкавання, непрымальнасць мер незаконнага націску, а таксама ўмяшання ва ўнутраныя справы ў міжнародных адносінах і дамовіліся прадоўжыць сумесна развіваць гэтыя пытанні на міжнароднай арэне.

У гэтым кантэксце беларускім бокам выказана поўная падтрымка ініцыятывы Старшыні КНР Сі Цзіньпіна па пабудове эканамічнай глабалізацыі на аснове агульнадаступнасці і талерантнасці.

Бакі дамовіліся прадоўжыць сумесную работу над прапанаванай Беларуссю Хартыяй шматпалярнасці і разнастайнасці XXI стагоддзя, якая будзе абмяркоўвацца ў ходзе адпаведнай Канферэнцыі высокага ўзроўню па еўразійскай бяспецы ў Мінску восенню бягучага года.

Кітайскі бок вітаў уступленне Беларусі ў ШАС. Максім Рыжанкоў запэўніў Ван І ў самым актыўным і ініцыятыўным удзеле беларускага боку ў рабоце арганізацыі і ў падтрымцы ініцыятыў кітайскага старшынства, у тым ліку ў рамках аб'яўлення 2025 года - Годам устойлівага развіцця ШАС.

Ван І ў сваю чаргу пацвердзіў падтрымку заяўкі Беларусі на атрыманне статусу партнёра БРІКС як чарговага кроку на шляху членства ў аб'яднанні.

Бакамі абазначана нацэленасць на бесперабойнае функцыянаванне існуючых механізмаў міжурадавых, міжпарламенцкіх, міжрэгіянальных і грамадскіх сувязей, а таксама стварэнне новых. У сувязі з гэтым дасягнута разуменне аб неабходнасці павышэння ролі беларуска-кітайскага міжурадавага камітэта па супрацоўніцтве, а таксама прынята сумеснае рашэнне аб узмацненні ўзаемадзеяння знешнепалітычных ведамстваў. З гэтай мэтай будзе падрыхтавана адпаведная праграма.

Асобная ўвага ўдзелена пытанням бяспекі ў Еўразійскім рэгіёне. Падрабязна абмеркаваны і звераны пазіцыі, канстатавана супадзенне падыходаў і дасягнуты дамоўленасці аб прадаўжэнні скаардынаваных крокаў у напрамку мірнага ўрэгулявання існуючых канфліктаў.

Беларусь пацвердзіла нязменнасць сваёй падтрымкі ўсіх намаганняў кітайскага ўрада па дасягненні нацыянальнага ўз'яднання, абароне нацыянальнага суверэнітэту, бяспекі і інтарэсаў развіцця.

Таксама міністрамі закрануты пытанні пашырэння прамых авіязносін паміж краінамі, супрацоўніцтва ў сферы спорту, адукацыі і культуры.

Перагаворы прадаўжаліся больш як тры гадзіны.