Навіны рэспублікі

Беларусы Ступакевіч і Глінчук сталі прызёрамі міжнароднага турніру па барацьбе ў Заграбе

У сталіцы Харватыі Заграбе завяршыўся міжнародны турнір па барацьбе Zagreb Open 2024, удзел у якім пад нейтральным флагам бралі беларускія спартсмены, паведамляе карэспандэнт БЕЛТА.

Zagreb Open - першы турнір 2024 года, які ўваходзіць у Рэйтынгавую серыю Аб'яднанага свету барацьбы. У заключны дзень спаборніцтваў наймацнейшых у шасці вагавых катэгорыях вызначалі прадстаўнікі грэка-рымскага стылю. Сярэбраную ўзнагароду нашай камандзе прынёс Максім Ступакевіч, у фінале турніру ў вазе да 55 кг наш спартсмен не справіўся з Адэмам Узунам з Турцыі.
Акрамя таго, у катэгорыі да 97 кг на п'едэстал узняўся наш Павел Глінчук. Падчас турніру беларус выбіў з сеткі венгра Тамаша Левая і Бейтулу Кайыздага з Турцыі, але ў чвэрцьфінале шлях Паўлу заступіў фін Арві Савалайнен. За права выступіць у бронзавым баі наш змагар адолеў літоўца Міндоўга Венцкайціса, а ў самым паядынку за трэцяе месца Глінчук перамог Алекса Сзоке з Венгрыі.
Што да вынікаў іншых беларусаў, то ў вазе да 60 кг Глеб Макаранка прайграў расіяніну Садыку Лалаеву ў асноўным турніры і яго суайчынніку Анвару Алах'яраву ў суцяшальным. Павел Лях у катэгорыі да 77 кг таксама дабраўся да суцяшальных сутычак за трэцяе месца, дзе ўступіў венгру Роберту Фрытшу. На старце турніру ў гэтай жа вазе наш Цімур Бердыеў выйграў два паядынкі, але ў адной восьмай фіналу прайграў турку Бурхану Акбудаку. У катэгорыі да 87 кг беларусы Кірыл Маскевіч і Ігар Ярашэвіч абодва выбылі з барацьбы на гэтай жа стадыі, роўна як і Кірыл Грышчанка ў вазе да 130 кг.
Усяго ўдзел у прэстыжных спаборніцтвах у Харватыі прынялі больш як 500 атлетаў з 50 краін, якія разыгралі трыццаць камплектаў узнагарод - па дзесяць у вольнай, грэка-рымскай і жаночай барацьбе. Да спіса