Прафілактычную акцыю «Беражыце дзяцей!» правядзе ДАІ ў Талачынскім раёне

З мэтай папярэджання дзіцячага дарожна-транспартнага траўматызму з 11 па 18 жніўня Дзяржаўтаінспекцыя Віцебскай вобласці правядзе рэспубліканскую прафілактычную акцыю «Беражыце дзяцей!».

Перыяд заканчэння школьных канікул і пачатак навучальнага года характарызуецца наяўнасцю шэрагу пагроз забеспячэння бяспекі дзяцей на дарогах. Адной з асноўных рызык з'яўляецца павелічэнне інтэнсіўнасці руху аўтатранспарту паблізу школ, абумоўленае актыўным выкарыстаннем бацькамі асабістых аўтамабіляў. За час канікул дзеці ў той ці іншай меры страчваюць навыкі бяспечных паводзін на дарозе.

Так, з пачатку бягучага года на дарогах Віцебшчыны траўмаваны 25 непаўналетніх і 4 загінулі.

У перыяд акцыі асаблівая ўвага будзе нададзена арганізацыі работы па прафілактыцы парушэнняў ПДР, кантролі стану вулічна-дарожнай сеткі і арганізацыі дарожнага руху паблізу школ, а таксама забеспячэнню дзейснага кантролю за выкананнем вадзіцелямі правілаў перавозкі дзяцей у транспартным сродку.

Нагадваем, што ў адпаведнасці з п. 178 Правілаў дарожнага руху перавозка дзяцей у легкавым аўтамабілі, абсталяваным рамянямі бяспекі, павінна ажыццяўляцца з выкарыстаннем:

дзіцячых утрымліваючых прылад, якія адпавядаюць вазе і росту дзіцяці, - ва ўзросце да пяці гадоў;

дзіцячых утрымліваючых прылад, якія адпавядаюць вазе і росту дзіцяці, іншых сродкаў (бустэраў, спецыяльных падушак для сядзення, дадатковых сядзенняў), якія дазваляюць бяспечна прышпіліць дзіця з дапамогай рамянёў бяспекі, прадугледжаных канструкцыяй транспартнага сродку, - ва ўзросце ад пяці да дванаццаці гадоў.

Дапускаецца перавозіць дзяцей ва ўзросце да дванаццаці гадоў без выкарыстання ўтрымліваючых прылад у выпадку, калі рост дзіцяці перавышае 150 сантыметраў, а таксама ў аўтамабілі-таксі.

Забараняецца перавозка дзяцей на пярэднім сядзенні легкавога аўтамабіля з выкарыстаннем дзіцячых утрымліваючых прылад, якія адпавядаюць вазе і росту дзіцяці, спінка якіх разгорнута да лабавога шкла транспартнага сродку, калі пярэдняе сядзенне мае падушку бяспекі, за выключэннем выпадку, калі механізм франтальнай падушкі бяспекі адключаны.

У адпаведнасці з п. 181.6 ПДР забараняецца перавозіць дзяцей на каленях у кіроўцы, у пасажыра на пярэднім сядзенні легкавога аўтамабіля.

Паважаныя дарослыя, памятайце аб захаванні Правіл дарожнага руху, бяспека дзяцей у першую чаргу залежыць ад вас!

АДАІ Талачынскага РАУС