ВЫКАНАЎЧЫ КАМІТЭТ
У Беларусі выпрацоўваюць дадатковыя меры для мінімізацыі неабгрунтаванага і нядобрасумленнага пасрэдніцтва, расказала на прэс-канферэнцыі "Процідзеянне карупцыі ў Рэспубліцы Беларусь: дзяржаўная палітыка і сістэмныя меры" старшы пракурор упраўлення Генеральнай пракуратуры па барацьбе з карупцыяй і арганізаванай злачыннасцю Вольга Бахар, перадае карэспандэнт БЕЛТА.
Вольга Бахар адзначыла, што праблема застаецца актуальнай. Штогод праваахоўныя органы выяўляюць факты закупак па завышаным кошце, лабіравання пасрэдніцкіх структур. У 2025 годзе ўстаноўлена больш за 70 такіх злачынстваў.
Аналіз абставін сведчыць аб тым, што ў большасці выпадкаў незаконныя ўзнагароджанні ў інтарэсах пасрэдніцкіх структур прадастаўляюцца за заключэнне дагавораў у абход устаноўленых працэдур, атрыманне інфармацыі аб маючых адбыцца і праводзімых закупках, забеспячэнне перамогі канкрэтнага ўдзельніка, бесперашкодную прыёмку тавараў, работ, паслуг, а таксама за паскарэнне альбо своечасовасць аплаты.
Удзел пасрэднікаў у закупках, асабліва калі ў кошт тавару ці паслугі закладваецца памер перададзенага хабару, падрывае прынцыпы добрасумленнай канкурэнцыі і вядзе да неабгрунтаванага росту затрат. Па даручэнні Прэзідэнта Рэспублікі Беларусь Генеральная пракуратура прымае ўдзел у выпрацоўцы дадатковых мер для мінімізацыі неабгрунтаванага і нядобрасумленнага пасрэдніцтва. Адначасова дапрацоўваецца адпаведны праект указа кіраўніка дзяржавы", - адзначыла Вольга Бахар.
Яна нагадала, што з 2021 года ў рэспубліцы дзейнічае інстытут адказнасці юрыдычных асоб за карупцыйныя праявы.
"Мы паспяхова наладзілі правапрымяняльную практыку. Толькі па выніках мінулага года да адміністрацыйнай адказнасці прыцягнута больш за 140 прадпрыемстваў, службовыя асобы якіх асуджаны за дачу хабару ў інтарэсах іх юрыдычных асоб. На прадпрыемствы накладзены штрафы ў суме звыш 1,7 млн рублёў", - расказала Вольга Бахар.
Нярэдка да карупцыі маюць дачыненне прадстаўнікі замежных кампаній і прадпрыемстваў з доляй замежнага капіталу, якія імкнуцца процізаконным спосабам асвоіць беларускі рынак або захаваць на ім сваю прысутнасць. Гэта выклікае неабходнасць падтрымання і пастаяннага развіцця міжнароднага супрацоўніцтва. Пракуратура асвоіла новыя напрамкі ўзаемадзеяння з замежнымі калегамі: цяпер за межамі Беларусі праследуюць не толькі фізічных асоб, але і суб'екты гаспадарання, якія ўчынілі ў краіне подкуп у камерцыйных мэтах. Інфармацыя аб гэтым накіроўваецца ў дзяржавы па месцы рэгістрацыі нядобрасумленных кампаній для прыняцця да іх штрафных санкцый у замежных юрысдыкцыях.
Акрамя нагляду пракуратура таксама каардынуе дзейнасць усіх органаў, задзейнічаных у барацьбе з карупцыяй. У чэрвені мінулага года пад старшынствам генеральнага пракурора адбылася рэспубліканская каардынацыйная нарада па барацьбе са злачыннасцю і карупцыяй, на якой прыняты канкрэтныя меры для больш эфектыўнай дзейнасці дзяржаўных органаў па папярэджанні карупцыі. Арганізаваны маніторынг мясцовымі органамі ўлады працаўладкавання асоб, звольненых па дыскрэдытуючых падставах. Вызначаны меры па выкананні антыкарупцыйных норм у частцы выплаты пенсій асобам, якія ўчынілі службовыя злачынствы.
Рыхтуюцца змяненні ў закон аб барацьбе з карупцыяй, якія прадугледжваюць магчымасць канфіскацыі ва ўсіх катэгорый дзяржаўных службовых асоб і іх блізкіх сваякоў маёмасці, законнасць паходжання якой яны не пацвердзілі, а таксама спрашчэнне сістэмы дэкларавання даходаў і маёмасці.
"Генеральная пракуратура акумулюе інфармацыю аб нагляднай дзейнасці пракурораў па ўсёй рэспубліцы. Калі бачым праблематыку, нараджаюцца змяненні ў заканадаўства. Мэта - папярэдзіць", - адзначыла Вольга Бахар.