ВЫКАНАЎЧЫ КАМІТЭТ
Беларускія вытворцы будаўнічых матэрыялаў змаглі нарасціць экспарт па асобных пазіцыях, нягледзячы на складаныя ўмовы гандлёвага супрацоўніцтва з сумежнымі дзяржавамі і неспрыяльную эканамічную абстаноўку. Аб гэтым паведамілі карэспандэнту БЕЛТА ў прэс-службе Міністэрства архітэктуры і будаўніцтва.
Паводле даных ведамства, у студзені-ліпені бягучага года рост экспартных паставак назіраўся па нізкаэмісійным шкле на 35,8 працэнта, ячэістым бетоне на 12,7 працэнта, керамічнай цэгле на 17,8 працэнта, мінеральнай ваце на 13,7 працэнта, гіпсакардонных лістах на 81,6 працэнта і вапне будаўнічай на 6,4 працэнта.
Асноўныя экспартныя партнёры Беларусі па будаўнічых матэрыялах і вырабах - дзяржавы Еўрапейскага саюза і Украіна, якія займаюць каля паловы ў беларускім экспарце будматэрыялаў, і дзяржавы - члены Еўразійскага эканамічнага саюза з аналагічнай удзельнай вагой.
"Цяпер і на перспектыву трэба забяспечыць дыверсіфікацыю экспарту і арганізацыю паставак будаўнічых матэрыялаў па новых напрамках. Але пры гэтым асноўная задача для айчынных вытворцаў будматэрыялаў заключаецца не ў валавым павелічэнні паставак, а ў забеспячэнні эфектыўнасці экспартных продажаў і першарадным задавальненні ўнутранага попыту. Гэта будзе садзейнічаць умацаванню эканомікі прадпрыемстваў і забяспечыць ахову эканамічных інтарэсаў як айчыннай будаўнічай галіны, так і дзяржавы ў цэлым", - падкрэслілі ў прэс-службе.