Беларускі тхэквандыст Гурцыеў заваяваў алімпійскую ліцэнзію

У сталіцы Балгарыі Сафіі завяршыўся еўрапейскі кваліфікацыйны турнір на Алімпійскія гульні 2024 года ў Парыжы, паведамляе карэспандэнт БЕЛТА.

У Сафіі разыгрывалася 16 ліцэнзій на Гульні ў Парыж - па 8 у мужчын і жанчын. Для атрымання пуцёўкі на Алімпіяду спартсмену было неабходна дайсці да фіналу ў сваёй вагавой катэгорыі. З гэтай задачай справіўся беларускі тхэквандыст Георгій Гурцыеў, які выступае ў вазе да 58 кг. У першым раундзе наш спартсмен перамог армяніна Сайдалі Аліева, у чвэрцьфінале - партугальца Руя Браганшу, а ў паўфінале - Льва Карнеева з Сербіі. Уладальнікам ліцэнзіі з іншай паловы сеткі стаў ірландзец Джэк Вулі. У мінулым годзе Гурцыеў стаў сярэбраным прызёрам чэмпіянату свету ў Баку.

Блізкі да заваявання білета ў Францыю быў і наш Арцём Плоніс у катэгорыі звыш 80 кг. Падчас турніру беларус адолеў шведа Эрыка Фармакаса і македонца Дэяна Георгіеўскі, але ў паўфінале ўступіў славенцу Патрыку Дзіковічу. Тым не менш, без медаля з Сафіі Плоніс не з'едзе: у паядынку за бронзу Арцём быў мацнейшы за ўкраінца Андрэя Гарбара. Таксама ўдзел у кваліфікацыйным турніры брала наша Уладзіслава Сарокіна (да 49 кг), але ў першым раундзе беларуска прайграла Авішаг Семберг з Ізраіля.