Адрас: 211092, г. Талачын,
вул. Леніна, 1
Е-mail: odok@tolochin.vitebsk-region.gov.by
Тэлефон: (802136) 5-15-33
Дасягненне высокай якасці прадуктаў харчавання - вызначальны фактар паспяховага прасоўвання айчынных тавараў на знешніх рынках, а значыць, умацавання нацыянальнай эканомікі. Такое меркаванне выказаў старшыня канцэрна "Белдзяржхарчпрам" Алег Жыдкоў на семінары, прысвечаным сістэмам менеджменту якасці і праектаў як аснове канкурэнтаздольнасці і выканання паказчыкаў бізнес-дзейнасці, што прайшоў сёння ў Мінску і сабраў амаль 40 кіраўнікоў арганізацый канцэрна, паведамілі БЕЛТА ў прэс-службе Белдзяржхарчпрама.
Як адзначыў Алег Жыдкоў, дасягненне якасці ва ўсіх сферах жыццядзейнасці нашай краіны было вызначана важнейшай задачай дзяржаўнай палітыкі. "Пры гэтым якасць разглядаецца ў першую чаргу з пазіцыі якасці жыцця людзей, - сказаў ён. - Неабходна помніць, што ад кожнага з нас залежыць канкурэнтаздольнасць беларускіх тавараў, а значыць, узровень дабрабыту краіны ў цэлым і кожнага грамадзяніна ў прыватнасці".
Кіраўнік Белдзяржхарчпрама звярнуў увагу на тое, што з кожным годам патрабаванні да якасці і бяспекі харчовай прадукцыі становяцца ўсё больш строгімі як з боку органаў дзяржаўнага кантролю, так і з боку заказчыкаў і кліентаў, у тым ліку і непасрэдных спажыўцоў.
"Пакуль няма дакладнай арганізацыі ў кіраванні якасцю і бяспекай на прадпрыемстве, пакуль няма рэальнай зацікаўленасці ўсіх работнікаў у выпуску якаснай прадукцыі - ніякія дырэктыўныя ўказанні і ніякі адміністрацыйны націск не дадуць патрэбнага эфекту", - падкрэсліў Алег Жыдкоў.
Каб максімальна аптымізаваць працэсы на прадпрыемстве, пачынаючы ад камунікацыйных і заканчваючы тэхналагічнымі, а таксама гарантаваць спажыўцам якасць гатовай прадукцыі, Міжнародная арганізацыя па стандартызацыі ратыфікавала серыю міжнародных стандартаў ISO 9000. Яна ўкаранёна практычна на кожным прадпрыемстве канцэрна, мэта кіраўнікоў - усведамляючы яе магчымасці, карыстацца перавагамі, знаходзячы спосабы атрымання прыбытку.
Старшыня Дзяржстандарту Алена Маргунова абазначыла, што на атрыманне Дзяржаўнага знака якасці прэтэндуе 660 найменняў прадукцыі 217 прадпрыемстваў, у тым ліку і ад арганізацый канцэрна "Белдзяржхарчпрам". У сувязі з гэтым Алена Маргунова заклікала топ-мэнэджараў больш актыўна ўдзельнічаць у распрацоўцы стандартаў, адзначыўшы ў якасці прыкладу, што 53 працэнты распрацоўшчыкаў гэтых дакументаў у Расіі складаюць прадстаўнікі бізнес-супольнасці.
"У Беларусі ў асноўным спецыялісты Дзяржстандарту і яго арганізацый займаюцца распрацоўкай і разглядам праектаў стандартаў, аднак хацела заклікаць усіх прысутных больш актыўна ўдзельнічаць у дзейнасці тэхнічных камітэтаў па стандартызацыі", - дадала Алена Маргунова.
