Навіны рэспублікі

У якія рэгіёны Расіі лятаюць прамыя рэйсы, расказалі ў Нацыянальным аэрапорце Мінск

Беларуская сталіца звязана прамымі авіязносінамі з 18 рэгіёнамі РФ, паведаміла начальнік упраўлення знешнеэканамічнай дзейнасці Нацыянальнага аэрапорта Мінск Аксана Цярэшчанка на другім пасяджэнні рабочай групы па турызме ў рамках Саюзнай дзяржавы, праведзеным у Мінску, перадае карэспандэнт БЕЛТА.

Аксана Цярэшчанка адзначыла, што палёты ажыццяўляюць сем авіяперавозчыкаў. Асноўны партнёр - авіякампанія "Белавія", якая выконвае рэйсы па васьмі маршрутах. У мінулым годзе адкрыўся рэйс у Мурманск, сёлета - у Махачкалу.

"Сумесна з РФ прапрацоўваецца магчымасць прыцягнення расійскіх перавозчыкаў. За 1,5 года ўжо ёсць вынікі: адкрыты рэйсы з Ніжняга Ноўгарада, Пермі, Калугі, Уфы, Самары, Архангельска, Ульянаўска, Чэлябінска, Мінеральных Вод. Таксама ў 2024 годзе павялічана частата выканання рэйсаў", - расказала прадстаўнік Нацыянальнага аэрапорта.

Практычна ўсе рэйсы расійскіх перавозчыкаў, акрамя напрамкаў з Масквы і Санкт-Пецярбурга, выконваюцца ў тым ліку дзякуючы падтрымцы рэгіянальных улад Расійскай Федэрацыі. Адзначаецца дынаміка пасажырапатоку - за тры гады з 2021 па 2023 год прырост склаў 2,5 раза. За восем месяцаў бягучага года перавезена амаль 1,1 млн пасажыраў, што ў 4,6 раза больш у параўнанні з аналагічным перыядам 2021 года.

Традыцыйна самыя папулярныя напрамкі - Масква і Санкт-Пецярбург, на якія прыпадае амаль 87 працэнтаў ад агульнага пасажырапатоку з РФ. Таксама высокая загрузка на рэйсах паміж Мінскам і Мінеральнымі Водамі, Самарай, Чэлябінскам. З Самарай павялічана колькасць рэйсаў з 1 да 2 на тыдзень у чэрвені бягучага года, расказала Аксана Цярэшчанка.

Яна падкрэсліла, што пашырэнне геаграфіі палётаў - пытанне комплекснае, якое разглядаецца сумесна з іншымі дзяржорганамі, прадстаўнікамі турбізнесу. Паводле даных аналітычнай сістэмы Міжнароднай асацыяцыі паветранага транспарту, пасажырапаток па шэрагу расійскіх напрамкаў, якія яшчэ не абслугоўваюцца, складае 7 тыс. чалавек. "Гэта лічба не ўключае пасажыраў, якія дабіраюцца наземным транспартам да аэрапортаў перасадкі. Такія напрамкі, як Новасібірск, Краснаярск, могуць быць запатрабаваны", - адзначыла Аксана Цярэшчанка і папрасіла прадстаўнікоў турбізнесу інфармаваць наконт зацікаўленасці ў прамых авіязносінах, каб забяспечыць высокую запаўняльнасць самалётаў.