Навіны рэспублікі

Машынабудаванне і электратранспарт. У якой сферы ўзмоцніцца ўзаемадзеянне Беларусі і Казахстана

У Казахстане адкрыюцца новыя завод і вытворчыя лініі па выпуску аўтатэхнікі. Пра гэта ў эфіры тэлеканала СТВ расказаў Надзвычайны і Паўнамоцны Пасол Беларусі ў Казахстане Павел Уцюпін, паведамляе БЕЛТА.

Павел Уцюпін адзначыў, што прэзідэнт Казахстана Касым-Жомарт Такаеў у трэцім квартале гэтага года можа здзейсніць афіцыйны візіт у Беларусь, што надасць новы імпульс узаемаадносінам дзвюх сяброўскіх краін.

Пасол падкрэсліў, што перспектывы беларуска-казахстанскага супрацоўніцтва ёсць у сферы машынабудавання. У Казахстане функцыянуюць вытворчыя пляцоўкі, дзе выпускаюць трактары, камбайны, грузавыя аўтамабілі. "У канцы сакавіка - пачатку красавіка мы плануем увесці, па сутнасці, новы завод па вытворчасці кабін", - праінфармаваў Павел Уцюпін, дадаўшы, што ў Казахстане будзе наладжаны поўны цыкл па выпуску такой прадукцыі.

У гэты ж час, паводле слоў пасла, будзе ўводзіцца новая лінія па зборцы трактароў на заводзе, пабудаваным сумесна з казахстанскім партнёрам. "У нас ёсць шэраг новых праектаў, якія мы адпрацоўваем з казахстанскім бокам, зноў жа зыходзячы з канкурэнтаздольнасці нашага беларускага прадукту і магчымасцей беларускіх прадпрыемстваў. Размова ідзе аб пажарна-выратавальнай тэхніцы, каб тут яе таксама лакалізаваць і, ствараючы рабочыя месцы, мець магчымасць удзельнічаць у пастаўках гэтай тэхнікі", - адзначыў Павел Уцюпін.

Пасол дадаў, што тое ж самае датычыцца пасажырскай тэхнікі, у тым ліку беларускіх электробусаў, і сеткі электразарадных станцый.