Клятву на вернасць Радзіме і службоваму абавязку далі маладыя супрацоўнікі Віцебскай мытні

Напярэдадні Дня Канстытуцыі Рэспублікі Беларусь адбылася ўрачыстая цырымонія прыняцця прысягі маладымі супрацоўнікамі Віцебскай мытні-інспектарамі мытнай службы 3-га рангу.

Звяртаючыся да іх з сказаным на дарогу словам, начальнік Віцебскай мытні саветнік мытнай службы 1-га рангу Сяргей Лінкевіч выказаў упэўненасць, што маладое пакаленне супрацоўнікаў будзе гэтак жа добрасумленна і паспяхова рэалізоўваць дзяржаўную палітыку ў гэтай сферы, як і вопытныя супрацоўнікі і ветэраны.

- Сёння вы, маладыя, разумныя, прыгожыя, поўныя сіл і энергіі, робіце першыя крокі ў прафесіі. Вы ўжо выконваеце функцыі мытнага органа ў розных падраздзяленнях Віцебскай мытні. Памятаеце: мы-служым. Наперадзе ў вас вялікі шлях служэння нашай мірнай роднай Беларусі па абароне яе эканамічных інтарэсаў, - падкрэсліў Сяргей Лінкевіч.

Прыняцце прысягі адбылося ў адной з залаў Віцебскага абласнога краязнаўчага музея, дзе размешчана экспазіцыя «Абаронцы Айчыны». Гэта надавала асаблівую значнасць урачыстай цырымоніі. Клятву на вернасць Радзіме і службоваму абавязку маладыя супрацоўнікі вымавілі ў прысутнасці ветэранаў службы, а таксама студэнтаў, якія праходзяць практыку ў Віцебскай мытні, і навучэнцаў Мытнага класа сярэдняй школы № 12 Віцебска імя Л. М.Філіпенкі.